اهلا وسهلا بيكم فى
فيديو جديد بعد غياب لمدة 3 شهور تقريبا بدون فيديوهات
طبعا بعتذر عن الانقطاع الطويل دا بس كان غصب عنى فعلا كنت مشغول جدا
وسبب الانشغال ده هو نفس الموضوع اللى هنتكلم عنه فى المقال دا النهارده
وهو انتقالى من تركيا لهولندا اخيرا بعد معاناة اكتر من سنه ونص
الناس اللى متابعه اكيد عارفين انى كنت عايش فى تركيا من حوالى 3 سنين
ومن بعد اول سنه فى
تركيا وانا بدأت افكر فعليا فى الانتقال لأوروبا لعدة أسباب مختلفه
وفى المقال دا ان شاء الله هحاول احكيلكم تجربتى مع السفر لتركيا والعيش فيها
واهم الاسباب اللى خلتنى افكر اسيبها واسافر اوروبا وايه الفرق بين الاتنين
---------------------------------------------------------------------------------------
فى البدايه وزى اى شاب
مصرى نفسه يسافر وبيحلم بحياه نضيفه فى بلد محترم
وبما انى عمرى ماسافرت
قبل كده وباسبورى ابيض فكنت محتاج اقدم على فيزا سهله
وبصراحه موضوع دول
الخليج والكفيل والجو دا مكنش ضمن خطتى خالص
فمكنش قدامى فى الفتره
دى غير تركيا .. دوله نضيفه ومتقدمه ومحترمه وفيزتها سهله
طبعا الفيزا مكانتش
سهله بمعنى ان اى حد كان بيقدم عليها بياخدها من اول مره
الموضوع كان صعب برده
وليه شروط لازم تتوفر وكان فيه ناس كتير بتاخد رفض
وانا كنت من الناس دى
واترفضت فى اول مره وكانت صدمه بالنسبالى وقتها
لكن مايأستش وحاولت مره
تانيه بعد الرفض بحوالى 10 ايام واتقبلت فى المره دى
سافرت على تركيا ومكنتش اعرف اى حاجه عن البلد ولا اعرف حد فيها
واحده واحده بدأت
اتأقلم على الجو واتعرف على الناس وعلى ثقافة البلد ووضعها
بدأت ادور على شغل على
الجروبات على فيس بوك ومن خلال الناس اللى اعرفها
اشتغلت ف اكتر من مكان
وكل مكان كان ليه ايجابياته وسلبياته زى اى حاجه فى الدنيا
بس اغلب السلبيات اللى
كانت بتقابلنى فى اى شغل هى الناحيه الماديه
اللى لاحظته بعد فتره ان الرواتب تعتبر ضعيفه جدا بالنسبه لمستوى المعيشه
يعنى انت لو عايش فى
سكن مشترك كان الراتب يادوب يكفيك اكل وسكن ومواصلات
ولو كنت بتعرف توفر ومش
بتدخن ممكن توفرلك من 500 ل1000 ليره مثلا ف الشهر
طبعا دا يعتبر مبلغ
ضعيف جدا كان يعادل وقتها من 150 ل200 دولار تقريبا
يعنى بالنسبه لواحد
مسافر ومتغرب بعيد عن بيته واهله الموضوع مايستاهلش خالص
بس انا كنت بقول فى النهايه مهما كان الوضع اكيد بالنسبالى افضل من مصر
انا كان كل همى انى اطلع من مصر واعيش ف مكان كويس بغض النظر عن الماديات
صحيح انا كنت اتمنى ان يكون فيه شغل كويس بدخل محترم ومستوى مادى معقول
لكن لما لقيت الوضع كده قولت خلاص بقى انا سافرت واللى حصل حصل لازم اكمل
واهو افضل هنا شغال زى منا لحد ماربنا يسهل والاقى حاجه تانيه او فرصه افضل
بعد حوالى سنه ونص فى تركيا لقيت الوضع للأسف مفيهوش اى تقدم بل بيزداد سوء
العماله بتزيد وبالتالى العرض اكتر من الطلب فالرواتب مازالت ضعيفه مفيش زيادات
دا غير ان العمله بقت مش مستقره وفى النازل باستمرار والاسعار بدأت ترتفع
بدأت افكر فى اى طريق تانى يكون كويس وفيه فرصه افضل واهى الحياه تجارب
ومن هنا جاتلى فكرة السفر لأوروبا وبدأت ابحث فى الموضوع واعرف عنه اكتر
كنت فاكر ان كونى فى تركيا دا هيسهل عليا موضوع السفر لاوروبا او اى بلد تانيه
بس اكتشف انه للأسف مالوش اى علاقه وان انت على اى ارض بتتعامل بجنسيتك
البلد اللى انت فيها مش بتفرق معاك الا اذا كان وضعك فيها قوى
بمعنى ان عندك بيزنس خاص بيك مثلا او حساب بنكى قوى ودخل محترم وكده
المهم مكانش قدامى حل غير انى احاول واجرب بكل الطرق الممكنه فى حدود الامان
وانا اقصد هنا بالامان ان الموضوع يكون سفر شرعى وقانونى آمن مش تهريب
لان للاسف فى تركيا موضوع التهريب دا مشهور جدا وناس كتير بتلجأ ليه
هو بيكون مناسب احيانا بالنسبه للناس اللى عندهم مشاكل فى بلادهم او حروب
دا لما بيوصل بيقدم
لجوء وبيكون فرصته كويسه فى قبول الطلب ويقدر يظبط وضعه
لكن اللى زينا احنا
كمصريين مالناش لجوء ومش هتعرف تخلى وجودك فى البلد قانونى يعنى فى النهايه هتعيش
اسود وتفضل هربان من الشرطه زى اللى عامل عامله
حتى لو اشتغلت هتضطر
تقبل بأى راتب مهما كان ضعيف وممكن يتنصب عليك كمان
لانك بتكون شغال من غير
ورق ولا عقد عمل فمفيش قانون بيحميك
ودى من اسوأ الحاجات
اللى ممكن اى حد يعملها فى اوروبا وبتخليك تندم انك سافرت
فى تركيا عادى تعيش
وتشتغل من غير ورق لكن اوروبا مفيش تهاون فى الموضوع ده
المهم كان كل تفكيرى فى
الفتره دى انى اقدم على فيزا شنجن واجى ادور على شغل
ولو مالقتش شغل هرجع
تانى قبل انتهاء الفيزا زى ماقولت فى الفيديوهات اللى قبل كده
لما اخد الفيزا وارجع
تانى قبل ماتنتهى دا بيزيد من ثقة السفاره فيك فيما بعد
يعنى انا مثلا اخدت الفيزا اول مره لمدة اسبوعين ورجعت تانى قبل مدتها ماتخلص
لما اجى اطلب فيزا تانى
اقدر اطلبها شهر مثلا او اكتر وهتبقى نسبة القبول عاليه
وكده تبقى كسبت ثقة
السفاره وكمان الفيزا بقت مدتها اكتر عشان تقدر تدور على شغل
وهكذا لحد ماتظبط ف مره
وتلاقى الشغل اللى تقدر تعمل اقامه عليه وتستقر فى البلد
طبعا لو تعرف حد ف بلد
معينه ممكن يظبطلك حوار الشغل دا قبلها وتروح عليه
المهم انا بدأت اشوف
ايه متطلبات وشروط فيزا الشنجن وازاى اقدر اوفرها
وبدأت اشتغل على موضوع
الحساب البنكى الاول انى اسيب فيه اى فلوس معايا
وكمان احاول اشترى اى
حاجه من الفيزا واعمل حركات سحب وايداع وكده
وحاولت برده انى يكون
معايا عقد عمل من الشغل اللى انا فيه لكن ماظبطش للأسف
لان زى ماهو معروف 90%
من الاجانب فى تركيا شغالين بإقامات سياحيه بدون عقود
والاقامه السياحيه فى
موضوع التقديم على فيزا شنجن بيكون موقفها ضعيف جدا
واهم حاجتين لازم
توفرهم لضمان الفيزا هما الحساب البنكى والوظيفه او مصدر الدخل
طبعا لازم يكون حساب
بنكى محترم وفى نفس الوقت يكون متناسب مع دخلك الشهرى
المهم انى حاولت اظبط
الملف بقدر الامكان واوفر اللى اقدر عليه من شروط
وتوكلت على الله وقدمت
على فيزا فرنسا اول مره لانى سمعت ان القبول فيها اكتر
وللأسف ماحصلش نصيب
وكان الرد بالرفض لعدم توضيح سبب وغرض الزياره
انا طبعا كنت متوقع الرفض ومايأستش وقولت اظبط امورى وارجع اقدم تانى بعد فتره
بعد كام شهر ظبطت ورقى تانى وقدمت فى سفارة هولندا ودى كانت اكبر غلطه عملتها
لانى عرفت بعدها انك طالما اترفضت من سفاره يبقى لما لازم تقدم فيها تانى مره برده
لان بيظهر على السيستم ان قدمت فى السفاره التانيه دى قبل كده واترفضت للسبب ده
فانت جاى دلوقتى بنفس الورق تقدمه فى السفاره دى يعنى انت عاوز تسافر وخلاص
او بمعنى اصح عاوز تدخل اوروبا وخلاص مش فارق معاك بلد معينه عاوز تروحها
ودا طبعا بيزيد الشك فيك اكتر وغالبا بيتم رفض الطلب من غير مايتراجع اصلا
فانا قررت انى مش هقدم غير هولندا بعد كده لان خلاص مبقاش فيه قدامى حل تانى
وفضلت على
الوضع دا اكتر من سنه ونص قدمت فيهم 4 مرات واتقبلت فى المره ال4
نيجى بقى للنقطه
التانيه وهى (انا ليه سيبت تركيا وروحت اوروبا وايه الافضل فيهم)؟
بص هو موضوع الافضل
فيهم دا بصراحه انا ماقدرش احدده لانه نسبه وتناسب
يعنى ممكن تركيا مش
الافضل بالنسبالى فى حاجات معينه لكن فيه ناس تانيه بتفضلها
من وجهة نظرى ان تركيا
افضل لفئات معينه من الناس مش كل الناس ولا كل الظروف
يعنى مثلا لو حد معاه
مبلغ معين حابب يستثمره فى مشروع هيكون ناجح جدا فى تركيا
لو انت طالب وعاوز تدرس فيها هتكون مناسبه ليك لانها ارخص والتعليم فيها كويس
لكن موضوع انك تشتغل
موظف براتب اخر الشهر والكلام دا غير مجزى بالمره
واغلب الناس اللى فى
تركيا شغالين بالوضع دا ومستحملين عشان مفيش بديل بس
لان زى ماقولت الوضع
فعلا سئ لو هتقارن معدل الدخل والاجور مع مستوى المعيشه
كمان موضوع الشغل بدون
عقود ولا اوراق رسميه دا بيضيع حقك فى حاجات كتير
اولها التأمين طبعا
وحماية قانون العمل ليك انك ماتتعرضش لنصب او طرد من شغلك
دا غير اقامة العمل
اللى موقفها ومميزاتها افضل بكتير جدا من الاقامه السياحيه
وانا كنت اتكلمت فى
فيديو مفصل قبل كده عن العمل والحياه فى تركيا بشكل عام
ووضحت فيه الكلام دا
كله بالتفصيل .. وهسيبلكم اللينك تحت لو حابين تبصوا عليه
بالنسبه لاوروبا
والحياه فيها ومميزاتها وعيوبها اتكلمت عنها برده فى فيديوهات قبل كده
لكن انا دلوقتى هتكلم
عن اوروبا بشكل عام مش دوله واحده معينه
يعنى هنتكلم عن الحاجات
اللى هى مشتركه بين اغلب دول اوروبا وموجوده فيهم
زى مثلا الحد الادنى
للأجور اللى بيكون مناسب مع وضعك المعيشى ومصاريفك
وزى قانون العمل اللى
بيوفرلك كل حقوقك وبيحددلك ساعات عمل معينه
مستوى معيشى محترم
وخدمات كويسه ونضافة وامان على اعلى مستوى
والنقطه الاهم وهى انك
بتكون موجود فى اكتر من 25 دوله تقدر تتنقل بينهم براحتك
ممكن تجرب الحياه فى كل
دوله منهم وتستقر فى الاخر فى المكان اللى يناسبك
كمان ممكن تعمل زى بعض
الناس وتشتغل ف دوله وتسكن فى دوله تانيه
زى هنا فى هولندا مثلا
فيه ناس بتشتغل هنا وعايشيين اصلا فى المانيا
لان الراتب فى هولندا
اعلى , وايجار السكن والمصاريف فى المانيا ارخص
فانت بيبقى قدامك
خيارات كتير تقدر تظبط امورك بسهوله على الوضع اللى يناسبك
كمان الاقامه فى دوله
اوروبيه ف حد ذاتها موقفها قوى وبتسهلك حاجات كتير
طبعا دى كلها زى
ماقولنا حاجات شائعه ومشتركه بين بلاد كتير واغلبنا عارفها
بس انا بالنسبالى لسه
معرفش بصراحه تفاصيل اكتر عن الحياه هنا لانى لسه جديد
بس ان شاء الله الفتره
الجايه هنكون مع بعض على تواصل باستمرار
وهحاول اشارككم تجاربى
هنا والمميزات والعيوب او الصعوبات اللى قابلتنى
انا خلاص اخدت الخطوه
ومكمل ان شاء الله واتمنى يكون خير ومايكونش القرار غلط
ولو فيه عندكم اى
استفسار او اقتراح لموضوع نتكلم فيه اكتبولى فى الكومنتات
ولو فيه افكار معينه
حابين نعملها فى الفيديوهات شاركونى برده آرائكم
وياريت ماتبخلوش بالدعم
بقى عشان نقدر نستمر ونكمل مع بعض ان شاء الله