سلسلة اللجوء والهجرة || تفاصيل الهجره واللجوء الى بريطانيا ( انجلترا)

اولاً الهجرة :- 

مبدأيا طرق الهجره لبريطانيا بشكل عام مش مختلفه كتير عن دول اوروبا زى ماتكلمنا قبل كده

اللى هى عن طريق الحصول على عقد عمل وانت فى بلدك وبعد كده تكمل اجراءاتك مع السفاره

او انك تقدم على فيزا سياحه او دراسه وتدور على شغل وانت هناك لحد ماتحصل على عقد العمل

طريقة الحصول على وظيفه فى بريطانيا بتختلف من شخص لشخص حسب ظروف كل واحد

فيه مثلا اللى عنده حد يساعده فى ايجاد فرصة عمل وفيه اللى ميعرفش اى حد ولا ليه حد يساعده

وعشان كده هتكلم عن الطرق المناسبه للحالتين وكل المحاولات الممكنه ان شاء الله 

المهم ان لازم نعرف قبل اى شئ ان مفيش حاجه سهله , وكل شئ بيحتاج اجتهاد وبعد كده التوفيق من الله

بتصريح العمل فى بريطانيا

بصرف النظر عن اى طريقه من طرق البحث عن عمل اللى هتكلم عنها دلوقتى
لكن اجراءات الحصول على تصريح عمل فى بريطانيا تعتبر واحده فى كل الحالات
اللى بيختلف فقط هو طريقة ايجاد الوظيفه او عقد العمل فى المملكه المتحده
فى كل الاحوال عشان تحصل التصريح لازم يكون عندك اولا عقد عمل من صاحب عمل او مؤسسه
وطرق الحصول على عقد عمل بتكون عن طريق الانترنت او عن طريق الاصدقاء والمعارف
والطريقه اللى بيعتمد عليها كتير من العرب هى طريقة الاصدقاء والمعارف
يعنى لو تعرف اى شخص مقيم فى بريطانيا ممكن يساعدك فى الحصول على عقد عمل فيها
ولكن عشان نكون واضحين الطريقه دى برده مش مضمونه بنسبه كبيره
وده لان فى بريطانيا زى دول اوروبا برده اصحاب العمل بيكونو عاوزين يوظفو الشخص بشكل سريع
عشان كده بيلجأو للأشخاص المتواجدين داخل المملكه او داخل اوروبا على الاقل
ده بيكون افضل بالنسبالهم لانهم بيوفرو وقت وجهد كتير ده غير سهولة الاجراءات
وعلشان كده انا برشح طريقة السفر بفيزا دراسه او سياحه وبعد كده تبحث عن عمل وانت هناك

البحث عن عمل عن طريق الانترنت فى مواقع التوظيف

والطريقه دى بتعتمد فيها على نفسك بشكل كبير ومش هينفع تنتظر المساعده من اى شخص
لكن كمان لازم تعرف ان الطريقه دى بتحتاج للصبر والاصرار على تحقيق هدفك
كمان ممكن تهاجر لبريطانيا عن طريق الشركات والمؤسسات المتخصصه فى مجال عملك
يعنى على سبيل المثال لو كنت انت ممرض ممكن تتواصل مع المستشفيات فى بريطانيا
وده بيكون من خلال المواقع الرسميه الخاصه بالمستشفيات دى على الانترنت
وتبدأ تراسلهم وتبعتلهم السى فى بتاعك بمؤهلاتك ولو معاك شهادات خبره وتاريخ عمل
حاول تقدم اى شئ يدعم ملفك ويجعل موقفك قوى عشان تقدر تحصل على فرصه مناسبه
وطبعا الكلام ده بينطبق على اى وظيفه او مهنه تانيه , سواء كنت مهندس هتتواصل مع الشركات الهندسيه
ولو كنت بتشتغل مدرس هتتواصل مع المدارس
ولو شغال فى مجال المعمار هتتواصل مع شركات المقاولات وهكذا ,,
وعلى كل حال هسيبلكم تحت روابط اشهر مواقع البحث عن عمل فى بريطانيا

طريقة استخراج فيزا بريطانيا
ايا كانت الطريقه اللى هتتبعها فى الهجره فمتطلبات الفيزا هتكون تقريبا واحده باختلاف حاجات بسيطه
اول شئ هو اثبات معرفتك باللغه الانجليزيه وانك تقدر تتكلم بيها وكمان تكتبها وتفهمها بشكل جيد
وده بيكون عن طريق دوره تعلم اللغه الانجليزيه ولازم تحصل على المستوى B  على الاقل
تانى شئ هو جواز سفر سارى المفعول طبعا وفيه صفخات فارغه للتأشيره ولازم يكون فيه توقيعك
تالت شئ هو سجل جنائى لتوضيح حالتك الجنائيه فى بلدك ويكون خالى من الجرائم والاحكام الجنائيه
رابع شئ هو اثبات انك عندك محل اقامه فى بريطانيا
يعنى لو انت رايح سياحه بتقدم حجز فندق ولو رايح زياره لشخص بيكون هو المسؤل عن اقامتك
ولو رايح عن طريق عقد عمل فصاحب العمل بيبعتلك رسالة دعوه من بريطانيا ودى بتكون كافيه
خامس شئ تقديم رقم شهادة الكفاله البريطانيه وده بيكون فى حالة انك مسافر عن طريق عقد عمل
والشهاده دى بتكون عباره عن ملف الكترونى بيحتوى على كل المعلومات الخاصه بوظيفتك
وكمان بيكون فيه كل تفاصيل وبنود عقد العمل اللى انت حصلت عليه
سادس شئ وهو كشف الحساب البنكى , عشان تثبت انك معاك فلوس كافيه لإعالة نفسك
خصوصا ان انت هتروح اكيد هتكون محتاج فلوس تظبط وضعك لحد ماتبدأ تقبض مرتبك
سابع شئ كشف طبى مقبول للسفاره يثبت انك خالى من الامراض
بعد كده بتحجز موعد عن طريق مركز التأشيرات المسؤل عن تأشيره بريطانيا فى بلدك
وبتروح فى ميعادك ومعاك كل الورق ده الورقه الخاصه بالموعد
****************************************************************
نيجى بقى للجزء التانى من الفيديو وهو اللجوء
قبل ماتكلم عن الشروط الواجب توافرها عشان يتم قبول طلب لجوئك فى بريطانيا
لازم تعرف ان بيتم تقديم طلبات كتير جدا والعدد اللى بتقبل يعتبر قليل مقارنة بباقى دول اوروبا
شروط تقديم طلب اللجوء فى بريطانيا
الشرط الاول والاساسى زى ماقولنا فى كل الفيديوهات قبل كده هو انك تكون متواجد داخل بريطانيا
الشرط التانى انك تكون غير قادر على العوده لبلدك مره اخرى بسبب تعرضك لأى خطر
زى الاضطهاد او التعذيب او التهديد بالسجن او القتل او الصراعات والحروب
الشرط التالت هو ان ميكونش ليك بصمه فى اى بلد اوروبى اخر على نظام دبلن
وانك ماتكونش حاصل على اللجوء قبل كده فى اى دوله اخرى
كمان لازم يكون معاك الاوراق الرسميه اللى بتثبت شخصيتك وجنسيتك
زى جواز السفر وشهادة الميلاد والبطاقه الشخصيه وعقد الزواج وشهادة انهاء الخدمه العسكريه
وطبعا تقدر تقدم طلب لجوئك لحظة وصولك الى المطار او فى اى مركز شرطه داخل البلد
وهيتم سؤالك عن الاسباب اللى دفعتك للتقدم بطلب اللجوء وكمان الطريقه اللى وصلت بيها لبريطانيا
يعنى لازم تكون عامل حسابك كويس ومجهز اجابات منطقيه لكل الاسئله المتوقعه
وبيتم اعطائك بطاقة تحرك تسمى  ARC ودى بتسمحلك بالتحرك فى البلد لحين اصدار موعد للمقابله
ودى بيكون فيها اسمك وتاريخ ميلادك وصورتك الشخصيه وبصماتك
وكمان بيكون مكتوب فيها تحذير من عدم تشغيلك فى اى عمل فى بريطانيا
وكمان هتقدر من خلالها تستلم المساعده الماديه اللى هيتم صرفها ليك مؤقتا لحين النظر فى طلبك

مقابلة اللجوء فى بريطانيا
مقابلة اللجوء هتكوم باللغه اللى انت بتتقنها او اللى تقدر تتكلمها وتفهمها بشكل جيد
ولكن تأكد من كلامك اللى هتقوله بخصوص طلبك للجوء وانه يكون حقيقى ومقنع
وطبعا لو معاك صور او فيديوهات تثبت صحة كلامك واللى اتعرضتله ده هيدعم موقفك جدا
وبرده تقدر تعرض اى تسجيلات صوتيه لمكالمات او تهديدات او تقارير طبيه او اى شئ آخر
وخليك حريص على حضورك للمقابله فى نفس التوقيت اللى تم تحديده وبلاش تتخلف عنها
لانهم هيسألوك عن السبب ومش هيتم قبول مبرراتك الا لأسباب قهريه زى تعرضك لحادث او مرض

اذا تم قبول طلبك فى حق اللجوء سيتم الاعتراف بك فى بريطانيا كلاجئ
وحصولك على مساعدات ماديه شهريه مابين 380 الى 420 جنيه استرلينى
وهتضمن بقائك فيها لمدة 5 سنوات ولو كانت اسباب لجوئك مازالت قائمه يتم التجديد مره اخرى

لكن اذا تم رفض طلبك تقدر تقدم طلب استئناف القرار فى محاكم المملكه المتحدة
وده تقدر تقدمه بعد مرور 52 اسبوع من اصدار القرار

إجراءات لم الشمل فى بريطانيا
بالنسبه لموضوع لم الشمل دا اجراء بتعمله لو كنت قدمت طلب اللجوء لنفسك بدون افراد اسرتك
بعد قبول طلب لجوءك تقدر تقدم الطلب ده لجلب عائلتك تعيش معاك فى بريطانيا
ولكن ده بيكون متاح فقط بعد مايتم قبول طلبك ومنحك حق اللجوء الانسانى
كمان فيه بعض الشروط اللى لازم توافرها للموافقه على طلب لم الشمل فى بريطانيا
وبرده لازم نعرف مين اللى يقدر يقدم طلب لم الشمل وايه هى الحالات المتاحه
طلب لم الشمل ممكن يقدمه الزوج لزوجته او الزوجه لزوجها على حسب الموجود فيهم فى بريطانيا
كمان ممكن يقدمه الابن للم الشمل مع والديه او العكس لو كان عمره لا يتجاوز 18 عام
ودراسة طلبات لم الشمل بتتراوح من 3 الى 6 شهور وممكن تزيد او تقل على حسب كل حاله



مميزات اللجوء الانسانى فى بريطانيا
من المميزات المهمه للجوء فى بريطانيا هى الحصول على الحمايه والحياه فيها
والحصول على الدعم المالى والمساعدات من الدوله البريطانيه
والاستفاده من سوق العمل فى بريطانيا والاندماج فى المجتمع
ولم الشمل العائلى وجلب عائلتك تعيش معك فى امان زى ماوضحت
والاستمتاع طبعا بالطبيعه الساحره فى الريف البريطانى والاجواء الهادئه
وكمان بعد حصولك على الاقامه الدائمه بسنتين تقدر تقدم طلب للحصول على الجنسيه

عيوب اللجوء فى بريطانيا
طبعا كالعاده لازم نذكر العيوب زى مابنذكر المميزات , ومن ابرز عيوب اللجوء فى بريطانيا
اولا الحصول على اللجوء الانسانى فى بريطانيا صعب جدا مقارنة بغيرها من الدول
كمان اجراءات اللجوء طويله ورغم ان المده القانونيه من 3 الى 5 اشهر لكن فى الوقع بتكون اكتر
وبرده العمل فى بريطانيا للاجئين غير مسموح طوال مدة معالجة الطلب
وكمان الشعب البريطانى شعب منغلق على نفسه فى مناطق كتير وغير اجتماعى
وللأسف حتى بعد قبول طلبك هيكون حصولك على فرصة عمل مناسبه شئ صعب للغايه
لان كتير من اصحاب العمل فى بريطانيا بينظرو للعماله الخارجيه على انهم غير مؤهلين بشكل كبير


وفى النهايه طبعا اتمنى التوفيق للجميع , واتمنى يكون الفيديو مفيد بقدر الامكان
ولو فيه اى استفسار او توضيح تقدر تشوف المصادر الموجوده تحت الفيديو
وطبعا لو شايف ان الفيديو كان مفيد شاركه مع غيرك عشان الكل يستفيد
وياريت تدعمنا بعمل لايك واشترك فى القناه عشان تشوف اى فيديو جديد
ونتقابل على خير فى الفيديو الجاى ان شاء الله ,,,,,,,,,,,


اشهر مواقع البحث عن عمل فى بريطانيا :
https://www.reed.co.uk/
https://www.jobs.nhs.uk/
https://www.jobcentreguide.co.uk/
https://www.adzuna.co.uk/

المصادر :
http://lnnk.in/cla3
http://lnnk.in/cabo
http://lnnk.in/ccbn
http://lnnk.in/b8bo