أفضل الدول للهجره واللجوء لهذا العام

طبعا لما نتكلم عن افضل الدول للجوء مثلا دا مش معناه ان الدول دى هتقبل لجوئك بنسبة 100%

لان الحصول على اللجوء فى اى دوله زى ماحنا عارفين له ضوابط وشروط واجب توافرها

والشروط دى زى ماتكلمنا قبل كده هى تعرضك لأى خطر من أى نوع فى بلدك 

لكن طبعا الخطر دا مينفعش يكون نتيجة نساطات اجراميه زى تجارة الممنوعات او الاتهام بالقتل

الدوله الاولى فى قائمة افضل الدول للهجره واللجوء هى ( كندا )

استحقت كندا انها تكون افضل دول اللجوء فى العالم لعام 2019 وده طبعا بيعود لعدة اسباب

من ابرز الاسباب دى هى طرق اللجوء المتعدد الموجوده فيها 

ممكن تقدم طلب اللجوء لكندا من الخارج عن طريق المفوضيه 

او بمجرد وصولك لأراضيها فى اماكن كتيره زى ماهو معروف فى كل الدول

كمان فيه طريقه تالته للجوء وهى عن طريق الكفاله الكنسيه 

كمان من اهم الاسباب اللى بتجعل كندا الافضل هو التعامل الاكتر من جيد للحكومه الكنديه مع طالبى اللجوء

وتعتبر كندا حاليا هى الدوله الوحيده فى العالم اللى دايما ومازالت بترحب بالهجره واللجوء بشكل واضح

وكمان التعايش الكبير فى المجتمع الكندى بداية من الشعب اللى نسبه كبيره منهم من المهاجرين

بالاضافه لكده كمان تساوى الفرص للمهاجرين مع المواطنين واللاجئين

واكبر دليل على كده هو وزير الهجره أحمد حسن فهو من المهاجرين من اصول صوماليه

وده مش بينطبق على وزير الهجره بس .. فيه نسبه كبيره من الحكومه من اصول مهاجره

وابرز مميزات اللجوء فى كندا هى امكانية لم الشمل بعد الحصول على اللجوء مباشرة

والحصول على الجنسيه الكنديه بعد 3 الى 4 سنوات من الحصول على اللجوء

والحصول على دعم الحكومه الكنديه حتى الاندماج فى المجتمع الكندى

كمان التعليم فى كندا مجانى حتى المرحله الجامعيه

الدوله التانيه معانا فى القايمه هى ( ألمانيا )

فى الواقع ان المانيا مؤخرا شهدت تغيرات كبيره فى قانون اللجوء والهجره فيها

وانا اتكلمت عن الموضوع ده فى فيديو بالتفصيل هيظهر اللينك بتاعه فوق دلوقتى 

ودى من الاسباب اللى جعلتها فى مقدمة الدول الاوروبيه السنادى من حيث اللجوء والهجره

الأعداد الكبيره لطالبى اللجوء فى المانيا مأثرتش خالص على حصولهم على حق اللجوء

لكن اصبحت طلبات اللجوء تعالج بتدقيق اكبر فيما يخص اتفاقية دبلن الاوروبيه

اما الشئ الاروع فى المانيا بصراحه من ناحية الهجره واللجوء هو سوق العمل الالمانى

وهو زى ماقولنا قبل كده يعتبر من اكبر اسواق العمل فى العالم ان لم يكن اكبرهم على الاطلاق

وحجم سوق العمل طبعا بيتيح العديد من الخيارات امام طالب اللجوء او المهاجر

يعنى بيكون من السهل طبعا الحصول على فرصة عمل بسهوله فى مجالك او تخصصك

ومن ابرز مزايا اللجوء فى المانيا برده هو امكانيه لم الشمل بمجرد حصولك على اللجوء

لكن المشكله فى فترات انتظار معالجة الطلب بتكون طويله بسبب كثرة اعداد اللاجئين

التعليم فى المانيا طبعا مجانى للجميع فى كافة المراحل حتى فى المرحله الجامعية

كمان الحكومه بتقدم للاجئين مساعدات ماديه مناسبه بتختلف على حسب وضع كل شخص

اما بالنسبه للحصول على الجنسيه الالمانيه فبيكون بعد 8 سنوات 

الدوله التالته معانا فى قائمة افضل الدول للهجره واللجوء هى ( السويد )

رغم ان السويد حاليا ماتعتبرش افضل من قبل كده فى التعامل مع طالبى اللجوء

لكنها مازالت محافظه على مكانتها بين افضل الدول الاوروبيه للجوء والهجره

هى مش بتتبع لهجة حاده مع طالبى اللجوء , لكنها اعلنت انها مش هتقبل طلب اللجوء بسهوله برده

يعنى ببساطه مش هتمنح اللجوء الا للأشخاص اللى عندهم اسباب قويه للجوء وفعلا يستحقوه

وبالتالى اصبح الحصول على اللجوء صعب لكن فى المقابل اللى بيتقبل لجوءه بيتعامل معامله اكتر من رائعه

ومن الحاجات الكويسه اللى بتميز السويد عن غيرها هو التواجد الكبير للاجئين العرب

ودى بتكون ميزه كويسه لطالبى اللجوء اللى بيتم رفض طلبهم لكن ميقدروش يغادرو البلد خوفاً على حياتهم

هيقدرو انهم يتعرفو على ناس من الجاليه العربيه وده هيسهل عليهم حاجات كتير طبعا

ومن ابرز المميزات للجوء فى السويد هو العيش فى مجتمع ديمقراطى آمن

كمان بتقدر تحصل على عمل بسهوله حتى لو مش معاك لغه وده بسبب وجود العرب كتير زى ماقولت

يعنى بيكون فيه ناس من الجاليه العربيه عندهم محلات ومشاريع وتقدر تشتغل معاهم مبدأيا

كمان مستوى المعيشه وجودة الحياه فى السويد يعتبر من الافضل عالميا

الدوله الرابعه معانا فى القايمه هى ( النرويج )

طبعا النرويج كانت ومازالت من افضل الدول للهجره واللجوء والمعيشه بشكل عام

وده طبعا بيرجع لأسباب كتير اهمها هو مستوى المعيشه الجيد ومعدل دخل الفرد المرتفع

كمان العنايه الخاصه والتسهيلات اللى بتقدمها النرويج للاجئين والمهاجرين من جميع انحاء العالم

واعلنت اكتر من مره عن استعدادها لاستقبال اللاجئين من سوريا وبلاد اخرى زى العراق واليمن

من الواضح طبعا انها بتقدم تسهيلات اكتر للاجئين من بلاد النزاع المسلح والحروب

وبتمنحهم الحكومه النرويجيه اقامه قانونيه لمدة خمس سنوات ويتم تجديدها

كمان بيكون ليهم الحق فى التعليم والخدمات الصحيه والعمل والاندماج فى سوق العمل

وكمان الحصول على الجنسيه النرويجيه لمن يرغب بعد مرور 3 سنوات من اللجوء 

بشرط طبعا احترام القانون والاندماج بشكل ايجابى فى المجتمع النرويجى 

الدوله الخامسه والاخيره معانا فى القايمه هى ( نيوزيلندا )

تعتبر نيوزيلندا من أكتر دول العالم من حيث مستوى الامان وبتحتل مراتب متقدمه فى مؤشر السلامه العالمى

وده من اهم الاسباب اللى جعلتها من افضل البلاد للمعيشه

كمان نيوزيلندا من الدول اللى بتتجنب التدخل فى شئون الدول الاخرى

وهى من اكتر الدول المعزوله بيئياً بعيداً عن الحروب والنزاعات

وبتتميز بانها دوله هادئه الى حد كبير وغير مزدحمه على الاطلاق

ومستوى الاجور فيها يعتبر كويس جدا مقارنة بالدول الاخرى اللى فى نفس مستواها

كمان اللى بيساعد فى توفير حياه كريمه هو تكلفة الحياه اللى تعتبر متوسطه ومش مرتفعه 

وتعتبر نيوزيلندا برده من اقل دول العالم من حيث مستوى الفساد سواء فى الحكومه او القطاع الخاص

وكمان ساهمت الهجره اليها فى تكوين بيئه تناغميه منقطعة النظير 

يعنى لو كنت مسافر جديد لنيوزيلندا مش هتحس ان انت غريب 

لانك هتقابل ناس من جميع الطوائف والجنسيات واكيد هتقابل حد من جنسيتك

كمان نيوزيلندا بتتمتع بنظام طبى متقدم جدا وهو متاح لكافة المواطنين او المقيمين بشكل مناسب

وبرده التعليم فيها مجانى تماما فى القطاع الحكومى فى كافة المراحل الدراسية

كمان فى معاملتك مع الشعب النيوزيلندى هتشوف كم الرقى فى الاسلوب سواء فى العمل او التعامل بشكل عام

ودى تعتبر من افضل المميزات فى اى دوله لان التفاهم من أسس تقدم المجتمعات

وكده يكون خلص الفيديو .. لو فيه مواضيع تانيه حابين نتكلم فيها اكتبولنا فى التعليقات

ومتنسوش الدعم بعمل لايك وشير ,, واشترك فى القناه على اليوتيوب عشان تشوف الفيديوهات الجايه

ونتقابل على خير ان شاء الله ,,,,,,,,,,,,,,,,,

المصادر:

https://www.canada.ca/en.html

http://www.bamf.de/EN/Migration/migration-node.html

https://www.migrationsverket.se/English/Private-individuals.html

https://www.udi.no/en/

https://www.immigration.govt.nz/employ-migrants